الرشيدي مطلوووووب

[عزام الخريف]

مبطين عن المحاورات
استلم يابو حامد

وين الرشيدي عساه بخير 000 مبطي ولا جتني علومه

قالوا لي اخطا بحق تمير 000 واقول ما هانت سلومه

[ليلان الرشيدي]

حياك الله يابو عبدالله...


حضرت وآسف على التأخير&&&&قطاعة الوصل مذمومه

يالــيت شــــفرتها تشـــــفير&&&&مــاودي تصير مفهومه

[عزام الخريف]

شاعر ولك حشمه وتقدير 000 خذها وابعطيك معلومه

ما ارضى يجيك الزعل يا امير 000 لو خبلنا فسر كمومه

[ليلان الرشيدي]

اعــرفـــك ماتــعرف الــتزوير&&&&وقضية الخبل محســــومه

ماهــوب يفرق( شعر وشعير)&&&&ويبث الافكار مســـــمومه

[عزام الخريف]

جتنا الاوادم بلا تفكير 000 تقدح هل الشعر ورسومه

اظن ما في البلد تدبير 000 يردع هوى الخبل ويلومه

[ليلان الرشيدي]

ماودي انزل لـ فكر صغير&&&&نفسي عزيزه ومحشومه

وثقت في رئيـس التحــرير&&&&والا البعارين موســـومه

[عزام الخريف]

قضيتك وصلت الخرخير 000 وصويحبك غط في نومه

ماعاد ينفع لك التبرير 000 لو حلوا الوضع في يومه

[ليلان الرشيدي]

ســــــولف بها بوش عند ابلير&&&&واللــي يصـــفق لـــهم عـومه

واســــمك ضهر بآخر التقرير&&&&من ضمن تشــــــكيل منضومه

[عزام الخريف]

اسمي حضر بس فعله غير 000 والحر يفرق عن البومه

سلم على اللي حضرها عصير 000 وانهى المهمات مختومه

[ليلان الرشيدي]

ماحصل من حضرتك تقصير&&&& وش قوم دعواك وشش قومه؟

يســــأل معّمر عـمر بشـــــــير&&&&زعــــامة الــربـــع مزعــومــه

[عزام الخريف]

ترى هل الطيب فيهم خير 000 والربع قاموا معك قومه

وافتح لهم صفحة التغيير 000 كم نفس في السجن مظلومه

[هامة مضر]

ابداع
وليس غريب ان يبدع مثلكم
يعطيكم العافيه

[ليلان الرشيدي]

حطـــــيتها فــيّ فــالأخـــــير&&&&شــفت المســاحات مزحومه

بــس الاجاويد مهـما ايـصير&&&&مــاهي من الطيب محــرومه


وبعدين هامة مضر وش دخله!!!!؟هههههه

[عزام الخريف]

صح لسانك يابو حامد ولاهنت

الف شكر لك على هالروح الطيبه

شكرا للجميع على المتابعه

[تحدوهـ البشر]

الله يعطيكم العافيه ومن زمان مشتاقين لمثل هذي المحاورات ويالله واحد منكم يقابل المضري ههههههههه

[ليلان الرشيدي]

صح ربي بدنك يابو عبدالله وتأكد ان النفوس طيبة بإذن الله والمحاورات دائما ماتكون سعت صدر ومداعبات.

شكرا لك وشكرا لكل من تابعنا.

[عاشق الطير]

المشرف عاشق الطيـر

يشــكر الشـاعرين على هذه المحـاورة الملغمــة هههههه

وعلى هذه الروح الطيبـة ، وعلى هذا الإبداع ...

ويتطلع إلى ماهو أفضـل لجعـل مجلس الشعـر أفضل مجلس هنــا ..

شكـرا للجميــع

[ابو حمد]

الله يعطيكم العافيه شعارنا الكبار ابو عبدالله وابو حامد على المحاوره الرائعه,,
اعتقد ان جمال هذه المحاوره في رسائلها المبطنه لمن يعنيهم الامر وفي اعتقادي انها وصلت.
شرف لنا في مجالس تمير ان يكون هذا اللقاء المباشر بين الشعراء لينثروا ابداعهم الشعري
وتقديم موهبتهم وقدرتهم الشعريه امام الجميع,,
وهذا تميز وتفرد يحسب لشعرائنا بتواجدهم وتفاعلهم مع بعضهم البعض لابراز مجلس شعراء تمير
بالشكل المرضي للمتابعين.
تحياتي وتقديري,,

همسه لمشرفنا العزيز عاشق الطير:
الجميع ينتظر مثل هذه المحاورات المباشره بين شعراء مجالس تمير فهل من الممكن ان تكون المحاوره بشكل اسبوعي ويتم وضع جدول لمن يرغب من الشعراء في المشاركه لتكون الفائده
اكبر برؤية اكبر عدد من شعراء مجالس تمير؟
نتمنى ذلك اخوي عاشق وانت خير من يقوم بهذا الترتيب,,